L-GĦANIJIET TAD-DIPARTIMENT

Waqt il-lezzjonijiet l-istudenti jitgħallmu jużaw il-Malti mitkellem u miktub bl-aħjar mod possibbli. L-istudenti jingħataw taħriġ miktub u orali biex dan l-għan ikun jista' jintlaħaq. It-taħriġ miktub jitwassal permezz tal-lezzjonijiet dwar l-oqsma tal-kitba, tal-grammatika u tat-taħriġ il-fehem fost oħrajn. It-taħriġ orali jsir l-aktar fil-klassi permezz ta' diskussjonijiet u analiżi ta' kotba li jkunu nqraw kull xahar. Id-dipartiment jemmen li l-ewwel u qabel kollox l-istudent irid iħossu kunfidenti jitkellem u jesprimi ruħu permezz tal-lingwa Maltija mingħajr xkiel, mingħajr mistħija jew saħansitra preġudizzju soċjali li jpinġi l-Malti bħala lingwa inferjuri għall-Ingliż. Għaldastant, l-għan tagħna huwa wieħed soċjali li primarjament ma jikkonċernax biss l-esiġenzi tas-sillabu.

Dan l-għan jibni pedament sod għall-għanijiet l-oħra tad-Dipartiment li jwasslu lill-istudenti tagħna għall-eżami tas-SEC. Fil-fatt, minbarra l-lat soċjali tal-lingwa, l-istudenti jingħataw prattika fl-oqsma u l-ħiliet kollha b'mod partikolari fil-kitba, fil-grammatika, fil-letteratura, fit-taħriġ il-fehem, fil-kultura u fl-użu ta' espressjonijiet. Dwar dan tal-aħħar issir enfasi partikolari biex l-espressjonijiet jintużaw għall-kitba, l-aktar fil-komponimenti u mhux biss għal studju għax hu parti mis-sillabu.

ATTIVITAJIET

• Ta' kull sena jsir JUM NICOLO' ISOUARD li hu kwiżż għas-snin kollha tal-iskola li fih l-istudenti jikkompetu skont il-house tagħhom f'diversi oqsma fosthom il-lingwa, il-letteratura u l-grammatika. Din l-attivita` ssir lejn l-aħħar tas-sena skolastika bl-għan li l-istudenti jirrevedu x-xogħol li jkunu għamlu għall-eżamijiet tal-aħħar tas-sena.

• Ta' kull sena d-Dipartiment tal-Malti jorganizza wkoll sensiela ta' laqgħat ma' kittieba Maltin għall-istudenti tal-aħħar sena tas-sekondarja. Dawn il-laqgħat iservu biex l-istudenti jkollhom l-opportunita li jiltaqgħu wiċċ imb'wiċċ mal-kittieba tax-xogħlijiet letterarji li jkunu qed jistudjaw għall-eżami tas-SEC. Fost il-mistednin għal dawn il-laqgħat li saru l-iskola stess kien hemm is-sinjuri Victor Fenech, J.J. Camilleri, Charles Flores, Ġorġ Borg, Frans Sammut, Oliver Friggieri, Lino Spiteri u Mario Azzopardi.

Dawn il-laqgħat ikunu ta' għajnuna kbira biex l-istudenti jifhmu aktar ix-xogħlijiet letterarji marbuta mas-SEC, kif ukoll biex isiru jafu aktar lil dawn il-kittieba mil-lat personali. Fil-fatt, il-laqgħat ikunu kkaratterizzati minn mistoqsijiet u diskussjonijiet relatati max-xogħlijiet ta' dawn il-kittieba kif ukoll dwar il-ħajja privata tagħhom li ħafna drabi taffettwahom fil-kitba.

Id-Dipartiment tal-Malti

Wiċċ imb'wiċċ ma' Mario Azzopardi u Victor Fenech